Shveysariyada ko‘pchilik ovoz bilan 50 million Shveysariya franki (62 million AQSh dollari) va undan yuqori miqdordagi merosga 50 foizlik soliq solish taklif rad etildi. Bu haqda Reuters xabar berdi.

Saylovchilarning 78 foizi bu taklifga qarshi ovoz berdi. Bu natija hatto avvalgi so‘rovlarda prognoz qilingan uchdan ikki qismdan ham oshib ketdi. Bankirlar ovoz berishni Shveysariyaning boyliklarni qayta taqsimlashga tayyorligini ko‘rsatuvchi mezon sifatida baholab, uni diqqat bilan kuzatib bordi. Yaqinda Norvegiya va boshqa mamlakatlar boylik solig‘ini kuchaytirgan yoki shunga o‘xshash choralarni muhokama qilgan edi.

Shveysariyada dunyoning eng qimmat shaharlari joylashgan bo‘lib, turmush narxi haqidagi tashvishlar mahalliy siyosatda tobora dolzarb mavzuga aylanmoqda.

Yosh sotsial-demokratlar qanoti (JUSO) ilgari surgan ushbu tashabbus iqlim o‘zgarishi oqibatlarini kamaytirishga qaratilgan loyihalarni moliyalashtirishni maqsad qilgan. Tashabbusni tanqid qiluvchilar bu taklif badavlat odamlarning Shveysariyadan chiqib ketishiga sabab bo‘lishi va natijada umumiy soliq tushumlarining kamayishiga olib kelishi mumkinligini ta’kidlagan. Shveysariya hukumati saylovchilarni ushbu taklifni rad etishga chaqirdi.

• Shveysariya
• Taklif