Surxondaryo viloyatida giyohvandlik moddalari savdosi bilan shug‘ullanib kelgan fuqarolar qo‘lga olindi. Bu haqda Ichki ishlar matbuot xizmati xabar berdi.

Joriy yil 5-yanvar kuni, Surxondaryo viloyati TXTB xodimlariga shaxsini sir saqlashni iltimos qilgan fuqaro ariza bilan murojaat qilgan. Fuqaro o‘z arizasida, “B” ismli shaxs jinoiy sheriklari bilan temir yo‘l izlari yaqinida giyohvandlik moddalarini sotish va tarqatish bilan shug‘ullanib yurganligi hamda ularni qo‘lga olishda yaqindan yordam berishini bildirgan.

Arizaga asosan, shu kuni tezkor-qidiruv tadbirlari o‘tkazilgan. Natijada 2002-y.t. Termiz shahar, “Temir yo‘lchi” mahallasida yashovchi N.B. “shartli xaridor”ga, Termiz temir yo‘l logistika markazi hovlisida, 4,02 gramm “gashish” giyohvandlik moddasini 1.500.000 so‘mga sotayotgan vaqtida ushlangan.

Shundan so‘ng fuqaro N.B. roziligi asosida tezkor-qidiruv tadbiri davom ettirilib, shu kuni 2000-y.t. Termiz shahar, Ro‘dakiy ko‘chasida yashovchi, fuqaro J.J. o‘zining yashash xonadoni oldida, N.B.ga 2 gramm “gashish” giyohvandlik vositasini sotmoqchi bo‘lgan vaqtida ushlangan.

Tadbir davomida, J.J.ning yashash xonadoni ko‘zdan kechirilganda uning yashash xonadonidan 9.35 gramm, hamda uning sport kiyimi o‘ng cho‘ntagida 0.28 gramm “gashish” giyohvandlik vositasi borligi aniqlanib, xolislar ishtirokida hujjatlashtirib olingan.

Mazkur holat bo‘yicha O‘zbekiston Respublikasining Jinoyat Kodeksining 273-moddasi 5-qismi bilan jinoyat ishi qo‘zg‘atilgan.

• Chakana savdo
• Giyohvandlik
• Ichki ishlar
• Surxondaryo