AQSHning Ogayo shtatida joylashgan Hamden qishlog‘idagi xaroba uydan to‘rt yil davomida bitta xonada yashashga majbur qilingan 16 nafar bola qutqarildi. Bu haqda mahalliy huquq-tartibot idoralari ma’lum qildi. Ma’lum bo‘lishicha, 1,5 yoshdan 18 yoshgacha bo‘lgan bolalarning barchasi bir oilaga mansub. Tekshiruv davomida uyda sanitariya holati mutlaqo talabga javob bermagani, xonalar inson chiqindilariga to‘lgani aniqlangan.

Ayrim bolalar gapira olmagan, rivojlanishida nuqsoni bo‘lgan 18 yoshli qiz esa hatto o‘z ismini yozishni ham bilmagan. Voqea yuzasidan bolalarning ota-onasi hamda ikki nafar buvi va bobosiga nisbatan bolalarni xavf ostida qoldirish moddasi bo‘yicha 16 ta ayblov e’lon qilindi. Prokuratura mazkur jinoyat odam savdosi bilan bog‘liq emas, balki bir oila ichida sodir etilgan zo‘ravonlik holati ekanini ma’lum qildi. Huquq-tartibot idoralari bolalarni boshqa jinoyat yuzasidan o‘tkazilgan tintuv davomida aniqlagan. Rasmiylarga ko‘ra, ular taxminan 3,5×3,5 metr o‘lchamdagi bitta xonada saqlangan. Uyda qafaslar topilmagan, biroq bolalarning tashqariga chiqishiga qanday to‘sqinlik qilingani hozircha aniqlanmagan. Qutqarilgan bolalardan yetti nafari shifoxonaga yotqizilgan, yana ikki nafari vertolyot orqali og‘ir jarohatlar markaziga olib ketilgan. Ulardan biri og‘ir ahvolda bo‘lgani sabab sun’iy nafas oldirish apparatiga ulangan.

Tergov ma’lumotlariga ko‘ra, oila so‘nggi 20 yil davomida Ogayo shtatining turli hududlarida yashab, bolalarni davlat organlari nazoratidan yashirishga uringan. Ular maktabga ham yuborilmagan. Hozirda barcha 16 nafar bola davlat himoyasiga olingan. Tergov harakatlari davom etmoqda.