Qatar poytaxti Doha shahrida AQSH va Eron o‘rtasida o‘tkazilgan navbatdagi bilvosita muzokaralar yakunlandi. Biroq tomonlar hozircha uzoq muddatli tinchlik kelishuviga erishilganini ma’lum qilmadi.

Ma’lum qilinishicha, muzokaralarda asosiy e’tibor Hormuz bo‘g‘ozidagi dengiz qatnovini tiklash hamda Eronning muzlatilgan mablag‘lari masalalariga qaratilgan. Shuningdek, iyun oyida erishilgan vaqtinchalik kelishuvning asosiy bandlari ham muhokama qilingan.

Qatar Tashqi ishlar vazirligi navbatdagi muzokaralar Eron oliy rahbarining dafn marosimidan so‘ng o‘tkazilishini bildirib, Dohadagi uchrashuvlarda muayyan ijobiy siljish kuzatilganini qayd etdi.

AQSH prezidenti Donald Tramp esa Eronning yadroviy dasturi bo‘yicha ham ma’lum taraqqiyot borligini aytdi. Ammo muzokaralardan xabardor manbalarga ko‘ra, texnik uchrashuvlarda yadroviy dastur masalasi muhokama qilinmagan.

Qayd etilishicha, AQSH va Eron delegatsiyalari to‘g‘ridan to‘g‘ri uchrashmagan. Muzokaralar Qatar va Pokiston vositachiligida alohida formatda o‘tkazilgan.

Ayni paytda Hormuz bo‘g‘ozi orqali kemalar harakati qisman tiklangan. Biroq strategik suv yo‘lining huquqiy maqomi hamon bahsli bo‘lib qolmoqda. Shu bilan birga, Eron avgust o‘rtalaridan boshlab bo‘g‘oz orqali o‘tuvchi kemalardan to‘lov undirish niyatini yana bir bor ma’lum qildi.