Qirg‘iziston Milliy xavfsizlik davlat qo‘mitasi rahbari Qamchibek Tashiyev Xitoyning China Road kompaniyasi ishchilaridan qirg‘iz tilini o‘rganishni talab qildi.

U Issiqko‘l viloyatida avtomobil yo‘llari qurilishi bo‘yicha o‘tkazilgan yig‘ilish chog‘ida Barskoon – Qorako‘l yo‘li uchastkasiga kim mas’ul ekanini so‘ragan. China Road vakili rus tilida javob qaytarib, bu yo‘lda aynan uning kompaniyasi ish olib borayotganini tasdiqlagan.

Shundan so‘ng Qamchibek Tashiyev Qirg‘izistonda qariyb 20 yildan beri faoliyat yuritayotgan kompaniya vakillarining hanuzgacha davlat tilini bilmasligini tanqid qilgan va ulardan mahalliy tilni o‘rganishni boshlashni talab qilgan.

“Nima uchun hali ham qirg‘iz tilini o‘rganmagansizlar? China Road Qirg‘izistonda necha yildan beri ishlaydi? 20 yil beri! Nima, qirg‘izcha gapirishni bilmaysizmi? O‘rganing!”, – deydi u.

Xitoy kompaniyasi vakili esa Tashiyevning so‘zlarini bosh irg‘ab ma’qullagan.

• Qirg‘iziston
• Xitoy
• kompaniya