So‘nggi yuz yil ichida butun dunyo bo‘ylab qo‘l mehnati soni kamaydi. Ko‘pchilik ofisda o‘tirgan holatda faoliyat olib boradi. Dam olish kunlarida esa  odamlar kompyuter ekrani yoki televizor oldida “zanjirband” bo‘lmoqda. Natijada kam harakatlilik oddiy holga aylanib qolmoqda desak mulobalag‘a bo‘lmaydi.

Jismoniy faollik bo‘yicha JSST tavsiyalariga amal qilmaydigan, ya’ni haftasiga 150 daqiqadan kam o‘rtacha yoki 75 daqiqa intensiv aerobik faoliyatga ega bo‘lgan odamni harakatsiz odam deb atash mumkin. Inson yotganda yoki o‘tirganda, masalan, kompyuterda, mashina haydashda yoki televizor qarshisida bo‘lganda passiv hisoblanadi.

Odam o‘tirishga qancha vaqt sarflasa, sog‘liq muammolari xavfi shunchalik yuqori bo‘ladi, shuning uchun JSST passiv vaqtni qisqartirish, tez-tez turish va harakatlanishni tavsiya qiladi.

Agar siz uzoq vaqt o‘tirsangiz, yurak-qon tomir tizimi zaiflashadi va tegishli kasalliklar xavfi ortadi. Mushak-skelet tizimi ham o‘tirishdan aziyat chekadi, chunki asosiy mushaklarning ba’zilari to‘g‘ri ishlamaydi hamda umurtqa pog‘onasining holati o‘zgaradi, bu hech bo‘lmaganda bel og‘rig‘iga olib kelishi mumkin. Bundan tashqari, uzoq vaqt o‘tirish osteoporoz xavfini oshiradi.

Passiv dam olish tananing boshqa tizimlariga ham ta’sir qiladi – masalan, surunkali yallig‘lanishning rivojlanishiga yordam beradi va jinsiy gormonlar ishini buzadi. Bundan tashqari, uzoq vaqt o‘tirish metabolizmni o‘zgartiradi va passivlik, yomon kayfiyat, kognitiv pasayish hamda depressiya bilan bog‘liq.

Texnologiya olamida aynan insonlarni ish jarayonida ham ko‘proq energiya sarf qilishi va sog‘lom bo‘lishini ta’minlash maqsadida tik turib ishlash imkonini beruvchi ish stolini bozorga chiqarganiga bir necha yillar bo‘ldi.

Tik turganda inson ko‘p energiya sarf qilish imkoniga ega bo‘ladi. Siz bu stoldan foydalangan bo‘larmidingiz?

• Gimnastika
• Ish staji
• salomatlik