Qozog‘iston prezidenti Qosim-Jo‘mart To‘qayev AQSh prezidenti Donald Trampga “Artemis II” kosmik missiyasi muvaffaqiyatli yakunlangani munosabati bilan tabrik yo‘lladi. 

Prezident To‘qayev o‘z tabrigida Amerika ilm-fani yutuqlarini alohida ta’kidlab, ular jahon kosmonavtikasi rivojiga sezilarli hissa qo‘shayotganini qayd etgan.

Shuningdek, u bunday yirik loyihalar xalqaro ilmiy hamkorlikni mustahkamlashga xizmat qilishi va butun dunyo bo‘ylab yosh olimlar hamda muhandislarni ilhomlantirishini aytgan.

Eslatib o‘tamiz, joriy yilning 6-aprel kuni “Artemis II” missiyasi Orion kosmik kemasida ekipajdagi to‘rt nafar astronavt bilan Yer yuzidan taxminan 406–407 ming kilometr uzoqlikdagi masofaga parvozni amalga oshirgan. Shu tariqa Apollo 13 missiyasi tomonidan 1970-yilda o‘rnatilgan rekord yangilangan.

Yangi missiyaning avvalgidan asosiy farqi shundaki, kosmik kema Oyga qo‘nmasdan, uning Yerga ko‘rinmaydigan qismini suratga olib, uni aylanib o‘tishi kerak edi. NASA’ga ko‘ra, parvoz kutilganidan ham muvaffaqiyatliroq tarzda amalga oshirilgan.

Xususan, “Artemis II” missiyasi astronavtlari Oyning orqa tomonidan Yerga qaralganda sayyoraning botishi qanday ko‘rinishini aks ettirgan fotosuratlarni ham e’lon qilgan.

• Tabrik
• Tramp