Ishtirokchi kompaniyalar aktivlari 42 trillion dollarga yetdi16–18-iyun kunlari CAEx majmuasida V Toshkent xalqaro investitsiya forumi (TXIF–2026) bo‘lib o‘tadi. Nufuzli anjuman allaqachon bir qator rekordlarni yangiladi — unda qatnashish uchun dunyoning 100 mamlakatidan 8,3 mingdan ortiq delegat ro‘yxatdan o‘tgan. Forumda ishtirok etayotgan kompaniyalarning umumiy aktivlari qariyb 42 trillion dollarni tashkil etib, bu jahon yalpi ichki mahsulotining 38 foiziga teng.

Poytaxtga BlackRock, JPMorgan Chase, Visa, Masdar, Airbus, Meta va boshqa yirik xalqaro kompaniyalar rahbarlari tashrif buyurishi kutilmoqda. Shuningdek, real sektor vakillaridan 2 780 nafardan ortiq biznes yetakchilari ishtirok etadi.Anjumanning siyosiy nufuzi ham yuqori bo‘lib, unda 62 ta hukumat delegatsiyasi qatnashadi. Ochilish marosimida yetti davlat rahbari va hukumat rahbarlarining nutq so‘zlashi rejalashtirilgan.

Bu yilgi forum dasturi sezilarli darajada kengaytirilib, sun’iy intellekt, “yashil” energetika, logistika va strategik xomashyo yo‘nalishlariga bag‘ishlangan 79 ta tadbirni o‘z ichiga oladi. Shuningdek, O‘zbekiston investitsiya salohiyati ko‘rgazmasi, Xorijiy investorlar kengashi yig‘ilishi hamda qator sport va networking tadbirlari ham tashkil etiladi.Forum faoliyatini yoritish uchun 41 davlatdan 209 nafar xorijiy jurnalist akkreditatsiyadan o‘tgan.