Toshkent shahrida xizmat mavqelaridan foydalangan holda mo‘maygina daromad topishni reja qilgan advokatlik byurosi advokati hamda advokatlik hay’ati advokatining noqonuniy harakatlari fosh etildi.

Ular Uchtepa tuman ichki ishlar organlari faoliyatini muvofiqlashtirish boshqarmasining Tergov bo‘limi tomonidan Olmazor tumanida yashovchi, 1989-yilda tug‘ilgan fuqaroga nisbatan Jinoyat Kodeksining 168-moddasi 4-qismi “a” bandi bilan qo‘zg‘atilgan jinoyat ishi doirasida unga qo‘llanilgan qamoqqa ehtiyot chorasini tanishlari orqali uy qamog‘i ehtiyot chorasiga o‘zgartirib berish evaziga 14 ming AQSh dollari talab qilishadi. Bu haqda DXX matbuot xizmat xabar berdi.

Davlat xavfsizlik xizmati va Bosh prokuratura huzuridagi Departament xodimlari hamkorligida Olmazor tumanida o‘tkazilgan tezkor tadbirda, ular so‘ralgan pul mablag‘ini olgan vaqtlarida ashyoviy dalillar bilan ushlangan.

Hozirda ushbu ikki advokatga nisbatan Jinoyat Kodeksining 168-moddasi 3-qismi “a,v” bandlari va 28 orqali 211-moddasi 2-qismi “b” bandi bilan jinoyat ishi qo‘zg‘atilib, qamoq ehtiyot chorasi qo‘llanilgan.

“Shu o‘rinda ta’kidlash lozimki, xizmat mavqeini suiiste’mol qilgan holda, o‘zganing pul mablag‘ini o‘zlashtirish orqali boyib ketish hech qachon yaxshilikka olib kelmaydi”, – deyiladi xabarda.

• Advokat
• DXX
• Toshkent