Amir Temur xiyobonida mast holatda noo‘rin xatti-harakatlar sodir etgan ikki fuqaroning ijtimoiy tarmoqlarda tarqalgan videoyozuvi yuzasidan rasmiy maʼlumot berildi.

Unga ko‘ra, huquqbuzarlar: A. I. (1989-yilda Toshkent viloyatida tug‘ilgan) va S. M. (1991-yilda Toshkent viloyatida tug‘ilgan) 2022-yil 17-may kuni soat 23:20 lar atrofida Toshkent shahri, Yunusobod tumani, Amir Temur xiyobonida noo‘rin xatti-harakatlar sodir etgan.

Alkogolli ichimlik taʼsiridan mast holda bo‘lgan bu ikki fuqaro jamoat tartibini va fuqarolarning osoyishtaligini buzuvchi xatti-harakatlarda ifodalangan jamiyatda yurish-turish qoidalarini qasddan mensimasdan, IIO xodimlari eʼtiborini tortgan. Natijada IIO xodimlari tomonidan shaxslariga aniqlik kiritish maqsadida ular IIB binosiga taklif etilgan. Biroq, jamoat tartibini buzayotgan bu ikki fuqaro IIO xodimlarini uyatli so‘zlar bilan haqoratlab, ularning qonuniy talablarini bajarishdan bosh tortgan.

Huquqbuzarlarga oid maʼmuriy ish hujjatlari jinoyat ishlari bo‘yicha Yunusobod tuman sudining ish yurituviga 2022-yil 19-may kuni kelib tushgan. Shu kuni mazmunan ko‘rilib, ularning har ikkisiga nisbatan Maʼmuriy javobgarlik to‘g‘risidagi Kodeksning 183-moddasi (Mayda bezorilik) va 194-moddasi 1-qismi (Ichki ishlar organlari xodimining qonuniy talablarini bajarmaslik) bilan ushbu Kodeksning 34-moddasi tartibida 15 sutka maʼmuriy qamoq jazosi tayinlandi.

• Amir_Temur
• IIB
• Toshkent