Toshkent va Tbilisi hamkorlikni yangi bosqichga olib chiqmoqda O‘zbekiston va Gruziya o‘rtasidagi diplomatik aloqalarda muhim qadam qo‘yilmoqda. Ikki davlat rahbarlari muzokaralari yakunida Gruziyada O‘zbekiston elchixonasini ochish bo‘yicha kelishuvga erishildi. Prezident Shavkat Mirziyoyev va Gruziya Bosh vaziri Irakli Kobaxidze ishtirokida o‘tgan muzokaralarda siyosiy, savdo-iqtisodiy, investitsiya, transport-tranzit, turizm hamda madaniy-gumanitar yo‘nalishlardagi hamkorlikni kengaytirish masalalari muhokama qilindi.

Davlat rahbari Gruziyaga amalga oshirilayotgan ushbu davlat tashrifi so‘nggi yigirma yildan ortiq vaqt ichida O‘zbekiston Prezidentining mamlakatga ilk rasmiy tashrifi ekanini ta’kidlab, bu ikki tomonlama munosabatlarni sifat jihatidan yangi bosqichga olib chiqishini qayd etdi. Tomonlar hukumatlar, parlamentlar, ishbilarmon doiralar va madaniy-gumanitar aloqalarni yanada faollashtirish muhimligini ta’kidladi. O‘tgan yili ikki davlat o‘rtasidagi tovar ayirboshlash hajmi 270 million dollarni tashkil etgan bo‘lsa, joriy yil boshidan buyon bu ko‘rsatkich 100 million dollardan oshdi. Muzokaralar yakunida yaqin yillarda o‘zaro savdo hajmini 1 milliard dollarga yetkazish, eksport-import muvozanatini yaxshilash hamda transport-tranzit yo‘nalishlaridagi hamkorlikni kuchaytirish bo‘yicha qo‘shma “yo‘l xaritasi”ni ishlab chiqishga kelishib olindi.