Samarqand viloyatining ikki tumanida faoliyat yuritgan advokatlar pora olish bilan bog‘liq holatlar bo‘yicha qo‘lga olindi. Ular mahkumning jazo muddatini qisqartirish va sudlanuvchiga yengilroq jazo tayinlatib berishni va’da qilganlikda gumon qilinmoqda. Ma’lum qilinishicha, huquqni muhofaza qiluvchi organlar tomonidan o‘tkazilgan tezkor tadbirda Urgut tumanida faoliyat yurituvchi advokat mansabdor tanishlari orqali Jizzax viloyatidagi koloniyada jazo o‘tayotgan mahkumning muddatini qisqartirib berishni va’da qilgan.

U bu xizmat evaziga mahkumning yaqinidan 15 ming AQSH dollari olgan vaqtida ashyoviy dalillar bilan ushlangan. Yana bir holatda esa Qo‘shrabot tumanida ishlovchi advokat jinoyat ishi bo‘yicha himoyachi sifatida qatnashib, mansabdor tanishlari orqali sudlanuvchiga yengilroq jazo tayinlatib berishini aytgan. Buning evaziga u sudlanuvchining o‘g‘lidan 2 ming AQSH dollari talab qilgan va pulni olayotgan vaqtida qo‘lga olingan. Hozirda har ikki advokatga nisbatan jinoyat ishi qo‘zg‘atilgan. Tergov harakatlari davom ettirilmoqda.