Turkiyaning  Baliqesir viloyatida kecha tunda 6,1 magnitudali zilzila yuz berdi. Mamlakat Favqulodda vaziyatlar boshqarmasi ma’lumotiga ko‘ra, zilzila 6 kilometr chuqurlikda qayd etilgan.

Zilzila Istanbul, Izmir va atrofdagi viloyatlarda ham sezilgan. Ichki ishlar vaziri Ali Yerlikaya voqea joyiga borib, aholi bilan uchrashgan. Unga ko‘ra, zilzila oqibatida 3 bino va 1 do‘kon qulab tushgan, biroq hech kim halok bo‘lmagan.

Yerlikaya, shuningdek, 112 xizmatiga jami 504 ta murojaat kelib tushganini, ulardan 25 tasi bino zararlanishi bilan bog‘liq ekanini ma’lum qilgan.

Baliqesir hokimi Ismoil Ustao‘g‘li esa kasalxonalarga 22 kishi murojaat qilganini, ularning aksariyati vahima bilan sakragan yoki engil jarohat olganini aytdi.

Baliqesir viloyatida xavfsizlik chorasi sifatida bugun ta’lim jarayonlari bir kunga to‘xtatildi.

Prezident Rajab Toyyib Erdo‘g‘an ijtimoiy tarmoq orqali bayonot berib, “Zilziladan zarar ko‘rgan barcha fuqarolarimizga o‘z hamdardligimni bildiraman, barcha xizmatlar joyida faoliyat yuritmoqda”, – dedi.

• Turkiya
• Zilzila