AQSh prezidenti Yaqin Sharqdagi mojaro fonida neft narxlarining keskin oshishi vaqt o‘tishi bilan to‘g‘rilanishini va bu global xavfsizlik uchun kichik to‘lov ekanini bildirdi.

“Eronning yadroviy tahdidi bartaraf etilgandan keyin tez orada pasayadigan neft narxlarining qisqa muddatli o‘sishi AQSh va butun dunyo uchun xavfsizlik hamda tinchlik yo‘lidagi juda kichik to‘lovdir. Faqat ahmoqlar boshqacha o‘ylaydi”, — deb yozdi u Truth Social ijtimoiy tarmog‘ida.

“9-mart, dushanba kuni birjalar ochilishi bilan neft narxi bir barrel uchun 100 dollardan oshdi, chunki Yaqin Sharqdagi yirik energiya ishlab chiqaruvchilar neft qazib chiqarishni qisqartirdi. Etalon hisoblangan Brent markali neft fyucherslari qariyb 20 foizga qimmatlashib, bir barreli uchun 111,04 dollargacha ko‘tarildi. Holbuki, 28-fevraldan beri davom etayotgan Eronga qarshi harbiy operatsiya boshlanishidan oldin, uning narxi bir barrel uchun taxminan 70 dollar atrofida edi. Amerikaning West Texas Intermediate (WTI) markali neft fyucherslari esa 16,8 foizga o‘sib, 106,17 dollarga yetdi”, – deya xabar bermoqda Reuters.

Neft bozoridagi eng muhim omil bo‘lib, Ho‘rmuz bo‘g‘ozining uzoq vaqtga to‘silib qolishi mumkinligi haqidagi xavotirlar qolmoqda. Tinchlik davrida ushbu bo‘g‘oz orqali har kuni jahondagi neft hajmining taxminan 20 foizi tashiladi. U, shuningdek, masalan, Qatardan suyultirilgan tabiiy gazni tashishda ham katta ahamiyatga ega.

Bu Rossiyaning Ukrainaga keng ko‘lamli bosqini boshlanganidan keyin, ya’ni 2022-yil fevraldan buyon kuzatilgan eng keskin o‘sish hisoblanadi. O‘shanda ham neft narxi barreli uchun 100 dollardan ancha yuqoriga chiqqandi.

• AQSh
• Eron
• Isroil
• Tramp
• Urush
• neft