Seshanba kuni Xitoy banki boshqaruvining sobiq raisi Liu Liange pora olgani va noqonuniy kredit berganligi uchun jazoni ikki yilga kechiktirish bilan o‘limga hukm qilindi.

Bu haqda Xinhua agentligi xabar bermoqda.

Agentlik ma’lumotlariga ko‘ra, Shandong provinsiyasining Jinan shahar xalq sudi Liu Liangeni taxminan 16,8 million dollarlik pora olganlikda aybdor deb topdi. Sud 2010 va 2023-yillar oralig‘ida Liu Liange turli lavozimlarda, jumladan, Xitoy eksport-import banki va Xitoy bankida yuqori lavozimlarda ishlaganligi, uchinchi shaxslar manfaati uchun xizmat vakolatlarini suiiste’mol qilganligi, ularga kredit moliyalashtirish, loyiha hamkorligi va kadrlar tayinlash kabi masalalarda yordam berganligini aniqlagan.

Bundan tashqari, sudlanuvchi huquqiy normalarni buzgan holda, zarur talablarga javob bermaydigan kompaniyalarga umumiy qiymati 3,32 milliard yuandan ortiq bo‘lgan kreditlar berishda ko‘maklashgani aniqlandi, natijada asosiy qarz bo‘yicha yo‘qotishlar 190,7 million yuandan oshgan.

• Pora
• Xitoy