5 ta chiroyli va sodda xonaki gul – ular alohida parvarishga muhtoj emas, goh-gohida qarab qoʻysangiz, shuning oʻzi yetarli, xursand boʻlib oʻsaveradi.

Uy sharoitida oʻsadigan gullarning parvarishi faqat suv quyish bilan cheklanmaydi: ularga qay darajada yorugʻlik kerakligi, havo harorati va namligi qanday boʻlishi lozimligini, oʻgʻitlarning qaysi turi toʻgʻri kelishini bilish zarur. Ammo gullarni sevuvchi, ularni xonadonlarida gurkirab turishini istovchilarning hammasi ham birdek bu masala bilan shugʻullanavermaydi. Bunga har xil sabablar boʻlishi mumkin. Mutaxassislar esa ana shunday insonlarga unchalik eʼtibor talab qilmaydigan xonaki gullar haqida maʼlumot berishgan. Bu gullar juda kam vaqtingizni oladi, quruq havoda ham oʻsaveradi, oʻgʻit ham, boshqa gultuvakka oʻtqazishni ham talab qilmaydi. Goh-gohida sugʻorib turilsa, shuning oʻzi yetadi.

Sanseviyeriya

Bu oʻsimlikni koʻplar “choʻrtan dumi”, deb ham ataydi. Bu gul yaproqlarining hajmi va shakli turlicha. Agar oʻziga mos keluvchi gultuvak tanlay olsangiz, bolaligingizdagi poliklinikalarni ham eslatadi. Uni, ayniqsa, qishda juda kam sugʻorish kerak. Moʻl-koʻl yorugʻlikka ham talabgor emas. Shuning uchun xonaning sizga maʼqul kelgan qismida yashnab turaveradi.

Sukkulentlar

Keyingi paytlarda sukkulentlar ancha mashhurlashib boryapti. Ular juda ham chiroyli, turli-tuman va alohida parvarishga muhtoj emas. Tuproqsiz ham oʻsaveradi. Qishda oyiga bir marta suv quyilsa, yetadi. Gultuvaklari ham chuqur boʻlishi shart emas.

Maranta

Tabiatan ajoyib suratlar chizilgan yirik yaproqli bu oʻsimlik qorongʻiroq xonada ham yashnab turaveradi. Unga sukkulentlarga qaraganda nisbatan koʻproq suv quyib turish kerak. Agar xonada namlik yetarli boʻlsa, qish oylarida unchalik suv talab qilmaydi.

Nefrolepis

Rang-barang paporotniklarning bir turi. Uy sharoitlariga moslashadi va havoni yaxshi tozalaydi. Uni yorugʻlik koʻp, biroq quyosh nurlari bevosita tushmaydigan joyda, shuningdek, isitish moslamalaridan uzoqroqda saqlash kerak. Yozda balkonga chiqarib qoʻysa ham boʻladi. Juda kam suv ichadi.

Molochay

Bu oʻsimliklar turi kaktuslarga oʻxshaydi. Ogʻir sharoitlarda ham oʻsaveradi. Biroq juda ham zararsiz emas. U ajratadigan sharbat tarkibida kuydirish xususiyatiga ega boʻlgan zaharli moddalar mavjud. Agar uyda yosh bolalar boʻlsa, uni tanlamagan maʼqul.

• Foydali
• qiziqarli