Chetga ishlashga ketgan fuqarolarga ham O‘zbekistonda ipoteka krediti olish imkoniyati beriladi. Bu prezident Shavkat Mirziyoyevning farmoni bilan tasdiqlangan “yo‘l xaritasi”da belgilandi.

Unga ko‘ra, chet elda vaqtincha mehnat faoliyatini amalga oshirayotgan shaxslar va salbiy kredit tarixiga ega bo‘lgan fuqarolar uchun ipoteka krediti va subsidiyadan foydalanish imkoniyatini kengaytirish ko‘zda tutilgan. Bu vazifa Markaziy bankka topshirilgan va ijro muddati 2025-yil 1-aprel etib belgilangan.

Iqtisodiyot va moliya vazirligi ham ushbu sanagacha ipoteka kreditini ajratishda banklarning xatarlarini kamaytirishga xizmat qiluvchi davlat ipoteka kafolatini taqdim etish mexanizmini joriy qilish bo‘yicha Vazirlar Mahkamasiga taklif kiritishi lozim.

Soliq qo‘mitasi Iqtisodiyot va moliya vazirligi bilan birga ko‘p kvartirali uy-joylardagi yangi turar va noturar joylarni qurilish tashkilotlaridan to‘lovni tijorat banki orqali amalga oshirib sotib olgan fuqarolarga to‘langan qo‘shilgan qiymat solig‘i summasining bir qismini keshbek sifatida qaytarish bo‘yicha taklif ishlab chiqish va Prezident administratsiyasiga kiritishi belgilandi.

• Ipoteka
• Kredit
• Qaror
• migrant