Mis global energetika tizimida muhim rol o‘ynaydi, deb yozadi USM Group (“Udokanskaya med” ham kiradi) asoschisi Alisher Usmonov Jahon Iqtisodiy Forumi saytidagi maqolasida.

“Mis ko‘pincha yangi oltin, yangi neft yoki hatto kelajak metalli deb nomlanadi, chunki u past uglerodli iqtisodiyotlar va yuqori texnologiyali sanoatlarda ajralmas rol o‘ynaydi” – deya qayd etgan Alisher Usmonov.

Shuningdek, maqolada Alisher Usmonov Xalqaro energetika agentligi ma’lumotlariga iqtibos keltirgan. Unga ko‘ra, 2040-yilga borib toza energiya texnologiyalarida qo‘llaniladigan minerallar va metalllar orasida mis, nikel va grafitga talab ustunlik qiladi. Bu vaqtga kelib misga talab 2020-yilga nisbatan 2,7 barobar oshadi.

“Ushbu metall qayta tiklanadigan energiya texnologiyalari uchun ham muhim bo‘ladi”, – deb yozadi Usmonov.

Bundan tashqari, USM asoschisi yaqin yillarda misga bo‘lgan talab metall narxining o‘sishiga olib kelishi va kelajakda taklifdan oshib ketishi mumkinligini ta’kidlaydi.

“Mis tanqisligining oldini olish uchun qidiruv va yangi loyihalarga sarmoya kiritish, shuningdek, ishlab chiqarish va mahsuldorlikni oshirish uchun texnologiyalarni ishlab chiqish kerak”, – deb yozadi milliarder.

2020-yil may oyida Jahon banki 2050-yilga borib, toza energiya texnologiyalariga ortib borayotgan talabni qondirish uchun mis, grafit, litiy va kobalt kabi minerallarni ishlab chiqarish deyarli 500 foizga oshishi mumkinligi haqidagi hisobotini taqdim etgan.

Mualliflarning hisob-kitoblariga ko‘ra, shamol, quyosh va geotermal energiyadan foydalanish hamda isish jarayonini 2° C dan past darajada ushlab turish uchun energiyani saqlash uchun 3 milliard tonnadan ortiq mineral va metalllar kerak bo‘ladi.

• Alisher Usmonov
• Metallurgiya
• Oltin