Yaqin Sharq davlatlaridan evakuatsiya qilingan o‘zbekistonliklar soni 5-mart kuni 9 361 nafarga yetdi. Bu haqda TIV matbuot xizmati xabar berdi.

1-martdan 5-mart soat 10:00 holatiga ko‘ra, O‘zbekistonga jami 9 361 nafar fuqaro evakuatsiya qilindi. Saudiya Arabistonidan muntazam hamda qo‘shimcha charter reyslar orqali 8 114 nafar O‘zbekiston fuqarolari vatanga qaytarildi, Birlashgan Arab Amirliklaridan 1192 nafar fuqaro O‘zbekistonga olib kelindi. Erondan 23 nafar, Bahrayndan 25 nafar, Ummondan 7 nafar fuqaro vatanga xavfsiz yetkazildi.

Xabarga ko‘ra, fuqarolarni O‘zbekistonga qaytarish bo‘yicha chora-tadbirlar tizimli va bosqichma-bosqich bajarilmoqda. Ayni paytda evakuatsiya asosan fuqarolik aviatsiyasi uchun havo hududi ochiq bo‘lib turgan mamlakatlardan amalga oshirilmoqda. Mintaqaning boshqa davlatlarida havo hududi ochilishi bilan mazkur tadbirlar tezkor ravishda tashkil etiladi va davom ettiriladi. Vazirlik fuqarolarni xotirjamlikni saqlashga, vahimaga berilmaslikka va vazmin harakatlanishga chaqirdi.

Shuningdek, ayni paytda xorijda bo‘lib turgan fuqarolardan mazkur mamlakatning ichki qoidalari va talablariga qat’iy rioya etish hamda faqat O‘zbekistonning davlat organlari va diplomatik vakolatxonalari tomonidan tarqatilayotgan rasmiy axborotga amal qilish so‘raldi.

• Evakuatsiya
• Tashqi ishlar vazirligi
• fuqaro