Kuni kecha  Rossiyada “Oltin Vityaz”  XXXII Xalqaro kinoforumi yakunlari sarhisob qilindi. Unda Buyuk Britaniya, Germaniya, Isroil, Eron, Avstraliya, Ispaniya, Kanada, Turkiya, Ukraina, Fransiya, Argentina va boshqa 20 ta xorijiy mamlakatlardan 165 ta kartinalar ishtirok etdi.

Yosh o‘zbek kinoijodkorlarining filmlari mukofotlar soni bo‘yicha birinchi o‘rinni egalladi. Jumladan, kinorejissyor Furqat Usmonovning “Inson” hujjatli filmi, Umid Iskandarovning “Sarobga yo‘l” badiiy filmi va Munisa Magametning “Skotch” qisqa metrajli filmlari hakamlar hay’atining maxsus mukofotlariga sazovor bo'ldi.

“Sarobga yo‘l” badiiy filmi taniqli aktyor Umid Iskandarovning ilk rejissyorlik ishi boʼlib, ushbu filmning nufuzli kinoforumda mukofotlanishi esa tahsinga loyiqdir.

Erishilgan yutuqlar haqida Аgentlik direktori Firdavs Аbduxoliqov shunday deydi: “Bu kabi mukofotlar va eʼtiroflarning koʼpayishi, avvalambor, muhtaram Prezidentimizning kinematografiya sohasiga, xususan, kinoijodkorlarga berayotgan eʼtibori, yaratayotgan sharoitlarining samarasi. Yosh kinoijodkorlarimizning xalqaro maydonda tanilib borayotganligi Yangi O‘zbekistonning yangi kino avlodi ijobiy maʼnoda shakllanayotganligidan dalolatdir”.

Rossiyalik mashhur rejissyor, hakamlar hayati raisi Andrey Konchalovskiy esa “Bu ko‘rsatkich o‘zbek kinosining yangi to‘lqini ekanligi ayni haqiqat”, - deya ta’kidladi.

• Lifestyle
• qiziqarli