Hozirgi kunda sport bilan shugʻullanish muhim ahamiyatga ega. Ertalab sport zaliga borasizmi yoki shunchaki mashq qilasizmi, har qanday jismoniy faoliyat salomatligingizga foyda keltiradi. Aksariyat odamlar issiq havoda jismoniy mashqlar bilan shugʻullanib boʻlmaydi deb oʻylashadi. Ammo, bir qancha kerakli maʼlumotlarni bilib olsangiz, jazirama kunlarda ham mashq qilishning ilojini topasiz.

1. Mashgʻulotlar uchun kunning salqin paytini tanlang.

Erta tongdan yugurish yoki piyoda yurishga harakat qiling. Bu vaqtda havo salqin va toza boʻladi. Agar ertalab jismoniy tarbiya bilan shugʻullana olmasangiz, mashgʻulotingizni kechqurungi paytga koʻchiring. Esda tuting, havo qanchalik salqin boʻlsa, mashgʻulotlaringiz shunchalik yaxshi natija beradi.

2. Tanani zoʻriqtirmang

Yurak-qontomir tizimini zoʻriqtirmaslik uchun mashgʻulotingizni oson mashqlardan boshlang. Shunga qaramasdan, tez charchaydigan boʻlsangiz, mashq qilish vaqtini 20 foizga qisqartiring. Asosiysi, sogʻligʻingizga zarar yetkazmaslikdir.

3. Sport bilan shugʻullanayotganda kiyinishga eʼtibor bering

Kiyim va poyabzal imkon qadar yengil boʻlishi, ularni tez-tez shamollatib turish kerak. Yengil va yupqa matodan tikilgan, qulay liboslarda shugʻullaning. Kiyimlar havoni qanchalik yaxshi oʻtkazsa, tana shunchalik tez soviydi. Issiq kunlarda bosh kiyim bilan mashgʻulot oʻtkazish tavsiya qilinadi.

4. Sport bilan shugʻullanganda suv balansini nazorat qiling.

Mashq qilishdan oldin, mashgʻulot paytida va keyin albatta suv iching. Bir soatlik mashgʻulot davomidasiz 500 ml gacha suyuqlik ichishingiz kerak. Gazli va tarkibida kofein boʻlgan har qanday ichimlikdan voz keching.

Shu bilan birga, vitaminlar, minerallar va ozuqaviy moddalarning muvozanatini kuzatib boring. Chunki uzoq muddatli mashgʻulotlardan soʻng ushbu moddalarga ehtiyoj paydo boʻladi. Mikroelementlarning yoʻqotilishi mushaklarning zararlanishiga, hushdan ketish va hatto yurakning toʻxtatishga olib kelishi mumkin. Mashq qilayotganda oddiy suv ichishning oʻzi yetarli boʻlmaydi. Unga qoʻshimcha ravishda vitaminlar ham isteʼmol qilish kerak.

• Foydali
• qiziqarli
• salomatlik