Малдив оролларида асал ойини ўтказиш учун борган испаниялик сайёҳ акула ҳужумига учради. Бу ҳақда “Даилй Mail” хабар берди.

Маълумотларга кўра, 31 ёшли Борҳа сувда бўлган пайтда унга акула ҳужум қилган. Оқибатда унинг оёғи тиззадан паст қисми узилиб кетган.

Сайёҳ зудлик билан шифохонага етказилган, шифокорлар унинг жароҳатланган оёғини кесиб ташлашга мажбур бўлган. Ҳозирда унинг аҳволи оғир экани айтилмоқда.

У рафиқаси билан тўйдан сўнг асал ойини ўтказиш учун Малдивга келган бўлиб, ҳодиса туристик экскурсия вақтида содир бўлган. Маълум қилинишича, гуруҳга океанда сузиш таклиф қилинган ва шу пайтда ҳужум юз берган.

Сайёҳнинг рафиқаси туристик компанияни судга бергани ҳам айтилмоқда. Унинг фикрича, хавфсизлик чораларига етарлича эътибор берилмаган.

Воқеа содир бўлган ҳудуд балиқни қайта ишлаш заводи яқинида жойлашгани ва бу жойда акулалар кўп учраши мумкинлиги қайд этилган.