2022 йил ғалла ҳосили учун минимал нархлар белгиланди. Бу ҳақда Қишлоқ хўжалиги вазирлиги Матбуот хизмати маълум қилмоқда.

Қайд этилишича, вазирлик ҳамда Ўзбекистон фермер, деҳқон хўжаликлари ва томорқа ер эгалари кенгаши жаҳон бозори ҳамда минтақавий биржалар нархларини таҳлил қилиб, 1 тонна ғалла ҳосили учун кутилаётган минимал нарх 3 млн сўм бўлиши ҳақида эълон қилди.

Вазирлик берган маълумотга кўра, бозорлардаги нархлардан келиб чиққан ҳолда ҳар чоракда кутилаётган минимал нархга тузатишлар киритилиб, оммавий ахборот воситалари орқали эълон қилинади.

Маълумот учун, 2020 йил 6 мартдаги “Ғалла етиштириш, харид қилиш ва сотишга бозор тамойилларини кенг жорий этиш чора-тадбирлари тўғрисида”ги Президент қарорига мувофиқ Қишлоқ хўжалиги вазирлиги ҳамда Ўзбекистон фермер, деҳқон хўжаликлари ва томорқа ер эгалари кенгашига жаҳон бозори, минтақавий биржалар нархларини таҳлил қилган ҳолда келгуси йил ғалла ҳосили учун кутилаётган минимал нархларни эълон қилиш ҳамда бозорлардаги нархлардан келиб чиқиб, ҳар чоракда ушбу нархга тузатишлар киритиб, оммавий ахборот воситаларида эълон қилиб бориш вазифаси юклатилган.

• G'alla
• қишлоқ_хўжалиги