Ижтимоий тармоқлар ва айрим ахборот манбаларида Тошкент вилоятининг Ангрен шаҳрида мактаб ўқувчисига дайди ит ҳужум қилгани, оқибатда бола оғир жароҳатлар туфайли вафот этгани ҳақида хабарлар тарқалди.

Тошкент вилояти ҳокимлиги мазкур ҳолат юзасидан расмий муносабат билдириб, ҳодиса бўйича тегишли ташкилотлар томонидан ўрганиш ишлари олиб борилаётганини маълум қилди.

Қайд этилишича, воқеадан сўнг шаҳар ва вилоят ҳудудида дайди ҳайвонларни назорат қилиш бўйича чоралар кучайтирилган. Хусусан, дайди итларни тутиш ва уларни махсус сақлаш жойларига жойлаштириш ишлари олиб борилмоқда.

Ҳокимлик маълумотига кўра, ўқувчига ҳужум қилгани айтилаётган ит Ангрен шаҳар ободонлаштириш бўлимининг дайди ҳайвонларни тутиш гуруҳи томонидан қўлга олинган. Тегишли ҳужжатлар расмийлаштирилиб, ҳайвон махсус сақлаш жойига олиб борилган.

Шунингдек, вилоят ҳокимлиги масъуллари иштирокида ўтказилган шошилинч йиғилишда ободонлаштириш хизмати, ветеринария бўлими, санитария-эпидемиологик осойишталик хизмати ҳамда бошқа масъул идораларга аҳоли хавфсизлигини таъминлаш ва бу каби ҳолатларнинг олдини олиш бўйича тезкор чоралар кўриш топширилган.

Ҳокимлик таъкидлашича, мазкур масала алоҳида назоратга олинган бўлиб, жамоатчилик хавфсизлигини таъминлаш бўйича зарур чоралар кўрилмоқда.

• Ангрен
• Toshkent viloyati