Давлат меҳнат инспекциясининг маълум қилишича, агар аномал иссиқ пайтида меҳнат шароити ходимнинг ҳаёти ёки соғлиғи учун реал хавф туғдирса, у ишлашни рад этишга ҳақли. Меҳнат кодексининг 358-моддасига кўра, ходим иш берувчини зудлик билан хабардор қилган ҳолда, хавфли ҳолатлар бартараф этилгунга қадар ишни бажаришни тўхтатиши мумкин.

Бунда унинг ўртача иш ҳақи сақланиб қолади. Бироқ инспекция таъкидлашича, аномал иссиқнинг ўзи ишни тўхтатиш учун автоматик асос ҳисобланмайди. Ходимнинг бундай ҳуқуқи фақат қуйидаги ҳолатларда қўлланилади: иш жойидаги юқори ҳарорат соғлиқ учун хавф туғдирганда; ходим узоқ вақт тўғридан-тўғри қуёш остида ишлаганда; иш берувчи ичимлик суви, соя ёки салқин жой, қўшимча танаффуслар ва иш вақтини мослаштириш чораларини кўрмаганда; иссиқлик уриши, сувсизланиш ёки бошқа жиддий хавф юзага келганда.

Иш берувчи ходимлар учун хавфсиз меҳнат шароитларини яратиши ва меҳнатни муҳофаза қилиш талабларига риоя этиши шарт. Меҳнат ҳуқуқлари бузилган тақдирда фуқаролар 1176 қисқа рақамига мурожаат қилишлари мумкин.