Давлат хавфсизлик хизмати Россиядан Ўзбекистонга юборилган жўнатма ичидан наркотик модда аниқланганини маълум қилди. Хоразм вилоятида ўтказилган тезкор тадбирда Урганч шаҳрида яшовчи, 1997 йилда туғилган ва аввал гиёҳвандлик билан боғлиқ жиноят учун судланган шахс Россиядан юборилган жўнатмани қабул қилаётган вақтида қўлга олинган.

Жўнатма текширилганда турли ширинликлар орасига шоколад ниқоби остида яширилган 538 грамм гашиш моддаси топилган. Яна бир ҳолат Тошкент вилоятининг Юқоричирчиқ туманида қайд этилган. Пойтахтлик 45 ёшли фуқаро контрабанда йўли билан олиб кирилиб, хуфия жойга қолдирилган 700 грамм гашиш моддасини қабул қилиб олаётганида ушланган. Ҳозирда ҳар икки фуқаро юзасидан жиноят ишлари қўзғатилиб, тергов доирасида уларнинг шерикларини аниқлаш чоралари кўрилмоқда.