“Россиянинг асосий экспорт нефти бўлган Уралс маркали нефть нархи баррелига тахминан 34 долларгача пасайди. Бу АҚШ томонидан ушбу соҳадаги энг йирик компаниялар – “Роснефт” ва “Лукойл”га қарши жорий этилган санкциялар фонида содир бўлди”, – дея ёзмоқда Bloomberg .

Россиянинг Болтиқ денгизидаги портлардан етказиб бериш шарти билан Уралс нефти баррелини 34,82 долларга, Қора денгиздаги портлардан эса 33,17 долларга сотиб олиш мумкин бўлган. Таққослаш учун, шу куни халқаро эталон ҳисобланувчи Brent нефти нархи 61 долларни ташкил этган. Bloomberg'нинг қайд этишича, бир йил давомида Brent нархи Уралсъга нисбатан анча кам пасайган, бу эса санкциялар таъсирини кўрсатади.

“Ҳозирда Россиядан жўнатилаётган Уралс нефтига берилаётган чегирма ўртача ҳисобда баррелига 27 долларни ташкил этмоқда. Нефть Ҳиндистонга етиб боргач, чегирма тахминан 7,5 долларгача қисқаради. Россия нефтининг жуда арзон нархлари айрим нефтни қайта ишлаш заводларини санкцияларга эътибор бермасдан уни сотиб олишга ундамоқда”, – дейилади агентлик мақоласида.

Россиянинг нефть қазиб олувчи компаниялари “Лукойл”, “Роснефт” ва уларнинг 34 та шўба корхонасига жорий йил октябрь ойида Россиянинг Украинага қарши урушини давом эттираётгани фонида АҚШ, Буюк Британия ва Европа Иттифоқи томонидан санкциялар жорий этилганди. АҚШ ҳукумати бу қарорни “Россиянинг тинчлик жараёнига жиддий қизиқиши йўқлиги” билан изоҳлаган эди.

• АҚШ
• Россия
• Санкция
• нефть