Аввалроқ хабар қилинганидек, Хива шаҳрида 4–5 июн кунлари «Pahlavon Mahmud — bahodirlar oʼyini» II Халқаро турнири ўтказилди.

Мазкур турнир Туризм ва маданий мерос вазирлиги, Бутунжаҳон стронгмен федерацияси ҳамда Хоразм вилояти ҳокимлиги билан ҳамкорликда ўтказилди.

Унда дунёнинг 14 давлати, жумладан, Бразилия, Янги Зеландия, Италия, Испания, Франция, Озарбайжон, Қозоғистон, Эрон, Ҳиндистон, Полша, Япония, Тожикистон ва Ўзбекистондан иштирок этган 15 нафар спортчи икки кун мобайнида 5 та тур:

- оғир қопларни «Қўқон арава»га ортиш ва уни маълум масофага олиб бориш;

- оғирлиги 120 дан 160 килограммгача бўлган «Сангижумон» тошларини кўтариш;

-турли оғирликда бўлган тошлар ортилган обкачни куч билан кўтариш;

- ҳар бири 250 кг дан бўлган Хива устунларини ушлаб туриш;

- баҳайбат қиличларни вертикал ушлаб туриш бўйича ўзаро беллашдилар.

Мусобақа якунидаги умумий натижаларга кўра, эронлик атлет Ризо Гейтаси ғолибликни қўлга киритди. Иккинчи ўрин янги зеландиялик Ронго Кингга насиб этган бўлса, кучли учликдан россиялик Пётр Мартиненко жой олди.

Шу тариқа ғолиб ва совриндорлар белгиланган 5000$, 3000$, 2000$ пул мукофотларига эга бўлишди.

Туризм ва маданий мерос вазирлиги, Бутунжаҳон стронгмен федерацияси (World strongmen federation) ҳамда Хоразм вилояти ҳокимлиги ҳамкорлигида ташкил этилган турнир давомида иштирокчилар Хива шаҳрига уюштирилган кичик тур доирасида Паҳлавон Маҳмуд мақбарасига ташриф буюришди.

Тадбирнинг ёпилиш маросимида йиғилганлар учун кўнгилочар концерт дастури намойиш этилди.

Эътиборлиси, вазни совринли ўринларни банд этган атлетларникидан сезиларли даражада енгил бўлишига қарамай, Ўзбекистон вакили Сирожиддин Қиличов мусобақада муносиб иштирок этган ҳолда, кучли ўнликка киришга муваффақ бўлди.

• Баҳодирлар ўйини
• Хива