Бангкок – Москва йўналишида парвоз қилаётган Аэрофлот самолёти касал бўлиб қолган аёл туфайли Самарқандга фавқулодда қўнишга мажбур бўлди. Бу ҳақда RBC нашри хабар берди.

“2023 йил 12 январь куни Бангкок-Москва SU271 рейсини амалга ошираётган самолёт йўловчининг соғлиғи ёмонлашгани сабабли Самарқанд аэропортига фавқулодда қўнишга мажбур бўлди”, – дейилади компания матбуот хизмати хабарида.

Қайд этилишича, самолёт қўнгач, аёл шифокорларга топширилган.

Шунингдек, парвоз вақтида икки йўловчи ўртасида низо келиб чиққан, улар Самарқанд аэропортида ҳуқуқ-тартибот органларига топширилган. Самолёт бортида 364 нафар йўловчи бўлган.

Таъкидланишича, йўловчилардан бири стюардессадан “ўзига хос муомала”ни талаб қилган. У боғлаб қўйилган эди, ғалаён туфайли ҳомиладор аёлнинг аҳволи ёмонлашган. “Маш” нашрининг ёзишича, жанжалчи ўзини Красноярск губернатори Александр Усснинг ўғли, деб таништирган (унинг ўғли Артем Усс Италия қамоқхонасида).

Аэрофлот вакилининг сўзларига кўра, самолётни парвозни давом эттиришга тайёрлаш пайтида “техник сабаблар юзага келган, натижада авиакомпания самолётни кейинги парвозлардан олиб ташлашга қарор қилган”. Одамларни Москвага етказиш учун кичикроқ сиғимдаги иккита захира самолёти ишлатилган. Йўловчиларнинг бир қисми “Аэрофлот”нинг навбатдаги – Самарқанддан Москвага мунтазам парвозига қайта бронь қилинди. Улар меҳмонхонада турар жой, озиқ-овқат ва ичимлик билан таъминланган.

• Bangkok
• Самарқанд
• Samolyot
• Tailand