Европанинг қатор давлатларида аҳоли даромадининг катта қисмини уй-жой харажатларига сарфламоқда. 2025 йил якунларига кўра, Грецияда аҳолининг 26,4 фоизи даромадининг 40 фоизидан ортиғини турар жой харажатларига йўналтирган. Бу ҳақда Euronews Евростат маълумотларига таяниб хабар берди.

Тадқиқотга кўра, Европа Иттифоқида уй-жой харажатлари аҳоли даромадига нисбатан энг катта молиявий юк бўлаётган давлат Греция ҳисобланади. Ундан кейинги ўринларда Дания (14,7 фоиз), Германия (11,2 фоиз), Швеция (10,8 фоиз) ва Эстония (8,8 фоиз) жойлашган. Европа Иттифоқи бўйича ўртача кўрсаткич 7,7 фоизни ташкил этган.

Европа Иттифоқидан ташқаридаги мамлакатларда ҳам юқори кўрсаткичлар қайд этилган. Хусусан, Швейсарияда аҳолининг 15,3 фоизи, Норвегияда 13,5 фоизи, Туркияда эса 10 фоизи даромадининг 40 фоизидан ортиғини уй-жой харажатларига сарфлайди. Энг паст кўрсаткич Кипрда кузатилган — 2,4 фоиз. Хорватияда бу кўрсаткич 3,2 фоизни ташкил этган.

Евростат маълумотларига кўра, 2015 йилдан 2026 йилнинг иккинчи чорагигача Европа Иттифоқида уй-жой нархлари ўртача 69 фоизга ошган. Ижара ҳақи ва энергия харажатлари ҳам ўсишда давом этмоқда. Уй-жой харажатларига ижара ёки ипотека фоизлари, коммунал тўловлар, суғурта, таъмирлаш ва солиқлар киради.

Мутахассислар уй-жой харажатларининг ошишига ижара ва кўчмас мулк нархларининг кўтарилиши, энергия ресурслари қимматлашиши, фоиз ставкалари ҳамда инфляцияни сабаб сифатида кўрсатмоқда. Даромади паст оилалар бу жараёндан кўпроқ зарар кўрмоқда.

Тадқиқотда келтирилишича, Европа Иттифоқида 34 миллиондан ортиқ киши даромадининг 40 фоизидан кўпроғини уй-жойга сарфлайдиган хонадонларда яшайди. Бундай аҳоли сони Германияда 9,4 миллион, Туркияда 8,6 миллион, Францияда 4,4 миллион, Испанияда 3,5 миллион ва Италияда 2,9 миллион кишини ташкил этади.

Камбағаллик хавфи остидаги аҳоли орасида ҳам уй-жой харажатлари юқори улушни эгаллайди. Европа Иттифоқида ушбу тоифадаги аҳолининг ўртача 29,1 фоизи даромадининг 40 фоизидан ортиғини турар жой учун сарфлайди. Грецияда эса бу кўрсаткич 82,6 фоизга етган.