Ўзбекистонда болаларга нисбатан жисмоний ёки руҳий зўравонлик содир этган педагоглар бир йил давомида мактабгача таълим ташкилотларида ишлай олмайди. Бу ҳақда 9 июль куни Сенатнинг 17-ялпи мажлисида маъқулланган қонунда белгиланди. Қонунга кўра, Маъмурий жавобгарлик тўғрисидаги кодексга таълим-тарбия жараёнида вояга етмаганларга нисбатан жисмоний зўравонлик қўллаш ёки уларни ҳақорат қилиш учун маъмурий жавобгарлик белгиловчи нормалар киритилмоқда.

Шунингдек, педагогик фаолияти давомида вояга етмаганларга нисбатан жисмоний ва (ёки) руҳий зўравонлик билан боғлиқ ҳуқуқбузарлик содир этгани учун маъмурий жавобгарликка тортилган шахслар бир йил давомида мактабгача таълим ташкилотларида педагогик фаолият билан шуғуллана олмайди. Қонун билан яна бир қатор янги нормалар ҳам жорий этилди. Жумладан, давлат ёки нодавлат муассасасининг тўлиқ таъминотида бўлган бола учун ота ёки онани алимент тўлашдан озод қилишга йўл қўйилмайди.

Бундан ташқари, етим болалар ҳамда ота-она қарамоғидан маҳрум бўлган болаларни оилага тарбияга бериш аввало уларнинг қариндошларига амалга оширилиши белгиланди. Сенаторлар таъкидлашича, мазкур қонун болаларнинг ҳуқуқ ва қонуний манфаатларини янада ишончли ҳимоя қилиш, таълим муассасаларида уларнинг шаъни, қадр-қиммати ва дахлсизлигини таъминлашга хизмат қилади.