Ўзбекистон Республикаси Конституциясининг 64- 77-моддаларига асосан, ота-оналар ва уларнинг ўрнини босувчи шахслар ўз фарзандларини вояга етгунига қадар боқиши, уларнинг тарбияси, таълим олиши, соғлом, тўлақонли ва ҳар томонлама камол топиши хусусида ғамхўрлик қилишга мажбурдирлар.

Бюронинг Хива шаҳар бўлими иш юритувига фуқаролик ишлари бўйича Боғот туманлараро судининг 16.08.2017 йилдаги қарздор Р.Каримовдан бир нафар фарзандининг моддий таъминоти учун ҳар ойдаги даромадининг ¼ қисми миқдорида алимент ундириш кўрсатилган ижро ҳужжати келиб тушган.

Кейинчалик ушбу суднинг 2023 йилдаги ҳал қилув қарорига асосан, алимент тўловлари 1/6 қисмга ўзгартирилган. Ота томондан белгиланган алимент пуллари ихтиёрий равишда ойма-ой тўлиқ тўлаб келинган. Жорий йилнинг 20 октябрида ота фарзанди вояга етгунга қадар тўланиши лозим бўлган алимент пулларини олдиндан тўлаш истагини билдириб, 2032 йилга қадар бўлган жами 156,7 млн. сўм алимент тўловларини амалга оширганлиги сабабли, ижро иши амалда тамомланган.

Яна шундай ҳолат Юқори Чирчиқ туманида амалга оширилган. Қарздор томонидан фарзанди вояга етгунга қадар бўлган алимент пулларини олдиндан тўлаш таклифи билдирилган. Ундирувчи ушбу таклифни қабул қилгани сабабли давлат ижрочиси томонидан мазкур ижро иши бўйича қолган алимент қарздорлиги ҳисобланиб, жами 53 млн. 54 минг сўмни ташкил этган. Ушбу сумма қарздордан тўлиқ ундирилиб, тилхатга асосан ундирувчига топширилган ва ижро иши тамомланган.

• Алимент
• ФҲДЁ
• МИБ