Тошкент вилоятининг Бўстонлиқ туманида 9 гектар ер майдонининг 4 гектар қисмини тураржой қурилиши учун расмийлаштириб беришни ваъда қилиб, бунинг эвазига 840 минг доллар талаб қилган шахс ушланди. У олдиндан сўралган 100 минг долларни олаётган вақтида Тошкент шаҳрининг Юнусобод туманидаги ресторанлардан бирида қўлга олинган. Бу ҳақда Ички ишлар вазирлиги хабар берди.

Маълум қилинишича, 1970 йилда Хоразм вилоятида туғилган, қурилиш материаллари савдоси билан шуғулланувчи бир нечта корхона эгаси нотурар объект ҳудудидаги ернинг бир қисмида тураржой бинолари қурилишини ҳужжатлаштириб беришни ваъда қилган.

У бу масалани Давлат кадастр агентлигида ишловчи мансабдор танишлари орқали пора бериш йўли билан ҳал қилиб беришига ишонтирган. Гумонланувчи мурожаатчидан аввал 100 минг доллар, кейинчалик яна 740 минг доллар, жами 840 минг доллар талаб қилгани аниқланган.

Ички ишлар вазирлиги Тезкор-қидирув департаменти ходимлари томонидан ўтказилган тезкор тадбир давомида гумонланувчи олдиндан талаб қилинган 100 минг долларни олаётган пайтида ашёвий далиллар билан қўлга олинган.

Ҳолат юзасидан унга нисбатан Жиноят кодексининг 168-моддаси 4-қисми (фирибгарлик) ҳамда 28-модда орқали 211-моддаси 3-қисми (пора бериш) билан жиноят иши қўзғатилган. Ҳозирда мазкур ҳолат юзасидан тергов ҳаракатлари олиб борилмоқда.