Бухородаги ИИБ биносида фуқаро вафот этгани айтилди. Ижтимоий тармоқларда тарқалган хабарлар юзасидан вилоят ИИБ томонидан расмий изоҳ берилди.

Қайд этилишича, 1985 йил Бухоро вилояти Вобкент туманида туғилган фуқаро Ҳ.Қ. ИИБ биносига кирмаган.

Жорий йилнинг 28 ноябрь куни Бухоро шаҳар ИИО фаолиятини мувофиқлаштириш бошқармаси 4-сон ИИБ Тергов гуруҳи юритувида бўлган, Ўзбекистон Республикаси ЖКнинг 169-моддаси 2-қисми “в,г” бандлари билан қўзғатилган жиноят иши бўйича, гувоҳ тариқасида жалб этилган фуқаро Қ.Ҳ. соат тахминан 15:00 да Бухоро шаҳар 4-сон ИИБ га жиноят иши ҳужжатлари билан танишиш учун келган, аммо терговчи хизмат вазифаси билан бошқа жойда бўлганлиги сабабли ИИБ биносига кирмасдан қайтиб кетган.

Маълум қилинишича, фуқарони ИИБ биносига кирмасдан ортга қайтган ҳолати видеотасвирга муҳрланган.

Шундан сўнг фуқаро Қ.Ҳ. “80 Z 015 ОА” рақамли “Матиз” автомобилини тўхтатиб, уни Бухоро шаҳридаги “Файзиобод” жоме масжидига олиб боришини сўраган. Йўлда, фуқаро Қ.Ҳ.нинг соғлиги ёмонлашган ва оғзидан кўпик чиқиб, хушини йўқотган. Ҳайдовчи хушсиз йўловчини тезкорлик билан Бухоро шаҳар касалхонасига олиб борган.

Кўрсатилган тиббий муолажаларга қарамасдан фуқаро Қ.Ҳ. шу куни соат тахминан 21:00 да касалхонанинг жонлантириш бўлимида вафот этган. Суд-тиббий экспертизасининг бирламчи хулосасига кўра ўлим “Тутқаноқ синдроми, ўпка ва мияга кислород ўткир етишмовчилиги” оқибатида юз берган. Текширув жараёнида мурданинг баданида ҳеч қандай тан жароҳатлари аниқланмаган.

Ҳолат Бухоро шаҳар прокуратураси томонидан ўрганилмоқда.

• Бухоро
• Экспертиза
• ИИБ
• O'lim