Буюк Британия ҳукумати Илон Маскка тегишли Х ижтимоий тармоғига нисбатан кескин чоралар кўриши мумкин. Бунга платформадаги сунъий интеллект – Грок орқали аёллар ва болаларнинг суратларини жинсий мазмунда ўзгартириш билан боғлиқ можаро сабаб бўлмоқда. Бу ҳақда The Telegraph хабар бермоқда.

Британия Фан, Инновациялар ва технологиялар вазири Лиз Кендаллнинг айтишича, мамлакат медиа регулятори Ofcom X платформасига нисбатан бир неча кун ичида чоралар кўриши мумкин.

Буюк Британия Бош вазири Кир Starmer Офcомъдан мамлакатда қарийб 20 миллион фойдаланувчига эга бўлган Хъни блоклашдан аввал платформага нисбатан қандай чоралар кўриш мумкин бўлса, ҳаммасини кўриб чиқишни сўраган.

Сўнгги пайтларда Х фойдаланувчилари Грок сунъий интеллектидан фойдаланган ҳолда ҳақиқий аёлларнинг, жумладан, сиёсатчилар ва машҳурларнинг суратларидан кийимларини олиб ташлашни сўраб мурожаатлар қилган. Британия интернет назоратчилари бундай тасвирларнинг айримлари даркнетда тарқалиб, болаларга нисбатан жинсий зўравонлик материаллари тоифасига киришини маълум қилган.

Илон Маск ўзининг Грок номли сунъий интеллект чат-боти билан боғлиқ можарони юмшатиш мақсадида ушбу хизматни фақат пуллик обуначилар учун қолдирган. Бироқ Британия ҳукумати бу етарли эмаслигини билдирмоқда.

“Аёллар ва болаларнинг тасвирларини жинсий мақсадда ўзгартириш жирканч ва мутлақо қабиҳ ҳолатдир. Агар пул тўланса, Грок бунга ҳали ҳам рухсат бераётгани ҳақоратли ва мутлақо қабул қилиб бўлмайдиган ҳол. Мен Ofcom парламент берган барча ҳуқуқий ваколатлардан фойдаланишини кутаман”, – дейди Технологиялар вазири Лиз Кендалл.

• Буюк Британия
• Ижтимоий тармоқ
• тақиқ