Британиянинг “The Telegraph” нашри манбалари Буюк Британия расмийлари россиялик тадбиркор Роман Абрамовичнинг “Челси” футбол клубини сотишдан олган 2,3 миллиард фунт стерлингни (тахминан 2,8 миллиард доллар) Украинага ўтказишга яқин эканини хабар қилди.

Қайд этилишича, маблағлар жабрланган украиналикларни қўллаб-қувватлаш учун янги ташкил этилган жамғармага йўналтирилиши режалаштирилган. Бу замонавий тарихдаги можаро қурбонларига қилинган энг катта хайриялардан бири бўлади.

Нашр суҳбатдошларининг таъкидлашича, трансфер яқин ҳафталарда амалга оширилиши мумкин: Хайрия комиссияси аллақачон жамғарманинг ташкил этилишини амалда маъқуллаган.

“Шубҳасиз, улар ҳам Европа Иттифоқидан яшил чироқ ёқишлари керак, чунки Абрамович ҳам санкциялар остида”, – дейилади мақолада.

Янги ташкилот раҳбари сифатида Буюк Британиядаги UNICEF’нинг собиқ ижрочи директори Майк Пенроуз тайинланиши режалаштирилган. Унинг номзодини Британия ҳукумати ҳам, Абрамовичнинг ўзи ҳам келишиб олган. Жамғарма бошқарувига гуманитар ва бизнес соҳаларининг таниқли арбоблари ҳам киритилган.

Аввалроқ яратилаётган жамғарма жабрланган россияликларга ҳам, жабрланган украиналикларга ҳам, ДХР ва ЛХР резидентларига ҳам ёрдам бериши ҳақида хабар берилган эди. Уни яратиш ғояси миллиардернинг ўзига тегишли бўлиб, у буни биринчи марта “Челси”ни сотувга қўйганида маълум қилган.

“Челси”ни сотиш

Абрамович футбол клубини 2003 йилда 140 миллион фунт стерлингга сотиб олган. Ўшандан бери “Челси” беш марта Англия Премьер-лигаси (АПЛ) ғолиби бўлди, икки марта Чемпионлар Лигаси, Европа Лигаси, беш марта Англия кубоги ва уч марта Англия лига кубогини қўлга киритган.

Россиянинг Украинадаги махсус операцияси бошланганидан бир ҳафта ўтиб Абрамович клубни сотишдан тушган барча маблағни қурбонларнинг яқинлари ва жанговар ҳаракатлар натижасида жароҳатланганларга ёрдам кўрсатиш учун махсус фондга ўтказишга тайёрлигини маълум қилди. 30 май куни “Челси” мулкдорнинг расмий ўзгаришини тасдиқлади: актив Тодд Боули бошчилигидаги консорциум ва “Clearlake Capital” инвестиция компанияси томонидан сотиб олинди.

Европа Иттифоқи Россиянинг ҳаракатларига жавобан активларини музлатиб қўйди ва 1000 дан ортиқ Россия фуқаролари, жумладан, 30 дан ортиқ йирик тадбиркорларнинг уюшма ҳудудига киришини тақиқлади. Еврокомиссия маълумотларига кўра, шу кунгача Европа Иттифоқи мамлакатларида деярли 10 миллиард евро музлатиб қўйилган. Абрамович ҳам санкциялар рўйхатида. Кейинроқ Англия премьер-лигаси раҳбарияти тадбиркорни футбол клуби раҳбари лавозимидан четлатди.

• Буюк Британия
• Челси
• Украина