Ижтимоий тармоқларда Чирчиқ шаҳридаги 30-сонли ихтисослаштирилган мактабгача таълим ташкилотида имконияти чекланган болаларга нисбатан қўпол муносабатда бўлингани акс этган видео тарқалган эди. Мазкур ҳолат юзасидан Ижтимоий ҳимоя миллий агентлигининг Тошкент вилояти бошқармаси томонидан ишчи гуруҳ тузилиб, ҳолат ўрганилди.

Текширув жараёнида тегишли масъуллар иштирокида тарбиячиларнинг ушбу хатти-ҳаракатларига ҳуқуқий баҳо берилди. Натижада қўполликка йўл қўйган тарбиячилар билан тузилган меҳнат шартномалари бекор қилинди.

Шунингдек, болалар омбудсмани ҳамда ҳуқуқни муҳофаза қилувчи органлар ходимлари иштирокида ота-оналар ва тарбиячилар билан тушунтириш ишлари олиб борилди. Ижтимоий ҳимоя миллий агентлиги Тошкент вилояти бошқармаси болаларга нисбатан бундай муносабатни қатъиян қоралаши ва келгусида шундай ҳолатларнинг олдини олиш бўйича кескин чоралар кўрилиши айтилди.

Ушбу ихтисослаштирилган мактабгача таълим ташкилоти ҳозирда таъмирлаш жараёнида бўлган ва тарбияланувчилар вақтинча ёндош ҳудуддаги мактабгача таълим ташкилотига жойлаштирилган. Ҳолат айнан шу жойда содир бўлган.

• Болалар боғчаси
• Чирчиқ