Дания қироличаси Маргрете II Янги йил муносабати билан қилган чиқишида 2024 йил 14 январда тахтдан воз кечишини маълум қилди. 83 ёшли қиролича тахтни ўз ўғли валиаҳд шаҳзода Фредерикга ўтказади, деб хабар бермоқда Дания давлат телеканали ТВ 2.

“Мен бу ҳақида эълон қилиш учун ҳозир энг тўғри вақт деб қарор қилдим. 2024 йилнинг 14 январида, севимли отамнинг ўрнини эгаллаганимдан 52 йил ўтиб, Дания қироличаси лавозимини тарк этаман”, — деди қиролича Маргрете.

Қиролича 2023 йилда белини операция қилдирди. Унинг сўзларига кўра, шундан сўнг тахтни ўғлига ўтказиш фикрига келган.

Қиролича аввалроқ ўлимигача бу лавозимда қолишини айтган эди. Тахтдан воз кечишга қарор қилиб, у Дания қироллик оиласи кўп авлодлар давомида амал қилиб келган анъанани бузди, деб таъкидлайди ТВ 2.

Қиролича Маргрете ИИ 1972 йил 14 январда отаси қирол Фредерик IX вафотидан сўнг тахтга ўтирган. Тож кийиш пайтида у 31 ёшда эди. Маргрете II Европадаги барча монархлар ичида энг узоқ - 50 йилдан ортиқ ҳукмронлик қилган қиролича ҳисобланади.

• Дания
• Qirolicha