2023 йил августидан 2025 йил декабригача Шимолий Корея Россияга қурол-яроғ етказиб берган ва қўшинлар юборган. Бу ёрдамнинг умумий қиймати 7,67 млрд доллардан 14,4 млрд долларгача баҳоланмоқда, – деб ёзади Bloomberg агентлиги Жанубий Корея Миллий хавфсизлик стратегияси институти ҳисоботига таяниб.

Таҳлилчиларга кўра, Россия Пхенян билан асосан ҳарбий технологиялар ва юқори аниқликдаги комплектловчи қисмлар орқали ҳисоб-китоб қилмоқда. Бу турдаги компенсациялар умумий тўловнинг 80–96 фоизини ташкил этади ва уларни сунъий йўлдошлар орқали кузатиш қийин.

Икки давлат ўртасидаги ҳарбий ҳамкорликка 2024 йилда Владимир Путин ва Ким Чен Ин томонидан имзоланган стратегик шериклик тўғрисидаги келишув асос бўлган. Унга кўра, томонлардан бирига қуролли ҳужум қилинса, иккинчиси “мавжуд барча воситалар билан” ҳарбий ёрдам кўрсатиши шарт.

Жанубий Корея Марказий банки маълумотларига кўра, урушдаги иштирок Шимолий Корея иқтисодиёти ўсишини тезлаштирган: 2024 йилда мамлакат ялпи ички маҳсулоти 3,7 фоизга ошган ва бу 2016 йилдан бери энг юқори кўрсаткич ҳисобланади.

• Россия
• Shimoliy Korea