Ички ишлар вазирлиги маълум қилишича, Тошкент шаҳрида ижарага олинган уйларни қалбаки ҳужжатлар орқали сотиш билан шуғулланган жиноий гуруҳ фош этилди.

Маълум бўлишича, “Хавфсиз ва соғлом юрт” профилактик тадбирлари доирасида Call марказга келиб тушган тезкор ахборот асосида ИИВ Тезкор-қидирув департаменти ходимлари томонидан махсус операция ўтказилган.

Аниқланишича, 1992 йилда туғилган шахс аввал фирибгарлик, ўғрилик ва ҳужжатларни қалбакилаштириш жиноятлари учун судланган бўлишига қарамай, яна тўрт нафар шахсни жиноий фаолиятга жалб қилган. 1980, 1997, 1994 ва 2000 йилларда туғилган гуруҳ аъзолари пойтахтдаги фуқароларга тегишли уйларни ижарага олиб, эгаларининг хабарисиз ҳужжатларни сохталаштириб, уларни сотишга уринган.

Тезкор тадбир давомида улар Миробод тумани Нукус кўчасида жойлашган, майдони 95 квадрат метр бўлган хонадон учун харидор топгани аниқланган. Нарх ҳар квадрат метр учун 1300 доллар қилиб белгиланган ва харидор билан оғзаки келишувга эришилган.

Шундан сўнг Яккасарой туманидаги нотариал идорада олди-сотди ҳужжатлари расмийлаштирилаётган вақтда, гуруҳ аъзолари 110 минг долларни олаётган пайтда ашёвий далиллар билан қўлга олинган.

Мазкур ҳолат юзасидан Жиноят кодексининг 168-моддаси 4-қисми (фирибгарлик) билан жиноят иши қўзғатилиб, гумонланувчиларга нисбатан қамоқ эҳтиёт чораси қўлланган.

• Фирибгарлик
• Soxta hujjat
• Тошкент
• Uy-joy