Ўзбекистонда олийгоҳларни давлат гранти асосида тамомлаган битирувчилар учун белгиланган камида уч йил ишлаб бериш талаби бекор қилиниши мумкин. Бу бўйича “Кадрларни давлат грантлари асосида мақсадли тайёрлаш тартиби тўғрисида низомни тасдиқлаш ҳақида”ги қарорга ўзгартириш киритиш таклифи жамоатчилик муҳокамасига қўйилди. 

Амалдаги қарор билан 2005 йилдан бери давлат гранти асосида бакалавриат ва магистратурага қабул қилинганларга камида уч йил ишлаб бериш шарти қўйиб келинади.

Таклифга кўра, мазкур талабни бекор қилиш назарда тутилмоқда. Унинг ўрнига битирувчининг ишлаб бериш муддати таълим йўналиши хусусиятидан келиб чиқиб, Олий таълим, фан ва инновациялар вазирлиги томонидан алоҳида белгиланиши қайд этилган. Қарордаги “камида уч йил” жумласи ўрнига “мажбурий” сўзини киритиш таклифи берилган.

Шу билан бирга, бир неча бандларга техник ўзгартишлар киритиш ҳам белгиланяпти. Масалан, битирувчиларни “доимий яшаш жойи” бўйича ишга тақсимлаш тартиби “яшаш жойи” деган сўзлар билан алмаштирилиши таклиф қилинган. Қарор муҳокамаси 26 мартгача давом этади. Ҳужжат маъқулланса, эълон қилинган кундан бошлаб расман кучга киради.

• Диплом
• Олий таълим
• Янгилик