Самарқандга ташрифининг иккинчи куни Президент Шавкат Мирзиёев Имом Мотуридий ёдгорлик мажмуасида давом этаётган қурилиш ва ободонлаштириш ишларини кўздан кечирди.

Ўтган йил Ўзбекистонда ақида илмининг асосчиси Абу Мансур Мотуридий таваллудининг 1155 йиллиги кенг нишонланганди. Шу муносабат билан Чокардиза қабристони ҳудудида мажмуа қайта таъмирланиб, ободонлаштириш ишлари бошланган.

Ҳозирда 26 гектар майдондаги мажмуада 250 ўринли масжид, кириш пештоқи, илмий марказ, кутубхона, музей ва автотураргоҳ бунёд этилмоқда. Қурилиш ишлари давомида Чокардиза қабристонида буюк фақиҳ Бурҳониддин Марғиноний дафн этилган жой аниқланиб, бу ерга мақбара қурилмоқда.

Ташриф давомида Қуръон тиловати ўқилди, алломалар йодга олинди. Президент бунёдкорлик ишларини кўздан кечириб, мажмуа дунё мусулмонлари талпинадиган зиёрат маскани эканини қайд этди ва замон талабларига мос шароит яратиш зарурлигини таъкидлади.

“Мажмуага келган киши аввало Имом Мотуридий бобомизнинг илмий-маънавий мероси ва ислом оламидаги мавқеи ҳақида ёрқин тасаввурга эга бўлиши, алломанинг маърифатпарвар қарашлари бугун ҳам долзарблигини ҳис қилиши керак”, – деди Президент.

Шунингдек, қурилишнинг сифатли ва ўз вақтида бажарилиши ҳамда ҳудудда яшил майдонларни кўпайтириш бўйича топшириқлар берилди.

• Президент
• Самарқанд
• Ташриф