Бугунги кунда ахборот алмашинуви жараёнининг ривожланиши ҳамда интернетнинг барча хонадонга кириб бориши натижасида инсонлар кўплаб иш ва хизматларни уйдан чиқмасдан, онлайн амалга ошириш имконига эга бўлиб бормоқдалар. Шу ўринда давлат органлари ҳам ўз фаолиятига доир хизматларни кўрсатишда турли фойдали веб-сайтларни йўлга қўйган бўлиб, уларнинг баъзилари тўғрисида бугун маълумот берамиз.

fo.birdarcha.uz

Мазкур веб-сайт Ягона интерактив давлат хизматлари порталининг тадбиркорлик субъектларини рўйхатдан ўтказиш модули ҳисобланади. Бу сайт орқали тадбиркорлик субъектлари онлайн тарзда бизнесни рўйхатдан ўтказиш ва қайта рўйхатдан ўтказиш имконига эга бўладилар. Шунингдек, сиз бу сайт орқали ҳар қандай тадбиркорлик субъекти тўғрисидаги маълумотларни топишингиз мумкин.

ijara.soliq.uz

Ушбу сайт Давлат солиқ қўмитаси кўчмас мулк ижара шартномаларини давлат солиқ хизмати органларида ҳисобга қўйиш интеркатив хизмати бўлиб, бунда юридик шахслар, жисмоний шахслар ва якка тартибдаги тадбирколар кўчмас мулкка оида ижара шартномаларини онлайн тарзда туза оладилар.

stat.uz

Бу Давлат статистика қўмитасининг расмий веб-саҳифаси ҳисобланади. Бу сайт орқали Ўзбекисоннинг қишлоқ хўжалиги, саноати, иқтисодиёти ва бошқа соҳалар билан боғлиқ кўплаб статистик маълумотларни, солиштирма жадвалларни топишингиз мумкин.

Кўпчиликка маълум бўлган норасмий orginfo.uz сайти ҳам тадбиркорлик субъектларига оид маълумотларни stat.uz даги маълумотлар орқали шакллантиради.

my.gov.uz

Ушбу веб-сайт Ягона интерактив давлат хизматлари порталидир. Сиз бу сайт орқали кўплаб давлат хизматларидан онлайн тарзда фойдаланишингиз мумкин.

Мисол учун, болани давлат мактабгача таълим муассасасига жойлаштириш учун ариза беришингиз, никоҳни қайд этиш учун ариза юборишингиз, турли солиқлар миқдорини ҳисоблашингиз, паспортни ID картага алмаштириш учун ариза юборишингиз ва бошқа хизматлардан фойдаланишингиз мумкин.

Сайтдаги хизматлар бепул ва пуллик тарзда амалга оширилади.

my.sud.uz

Сайт Ўзбекистон Республикаси Олий судининг интерактив хизматлар портали ҳисобланади. Сиз ушбу порталга кириб, судларга онлайн мурожаат қилишингиз, тўланиши лозим бўлган давлат божи миқдорини ҳисоблаб чиқишингиз, суд қарорлари билан танишишингиз мумкин.

vacancy.argos.uz

Ушбу сайт давлат фуқаролик хизматчилари вакант лавозимларининг ягона очиқ порталидир. Сиз мазкур сайт орқали давлат органларидаги бўш иш ўринлари тўғрисида маълумот олишингиз, очиқ ваканцияларга ариза юборишингиз, турли соҳалар бўйича намунавий тест саволлари билан танишишингиз ва бошқа хизматлардан фойдаланиш имкониятига эга бўласиз.

e-qaror.gov.uz

Бу маҳаллий давлат ҳокимияти органлари томонидан қабул қилинадиган қарорларни ишлаб чиқиш, келишиш ва рўйхатдан ўтказишнинг ягона электрон тизими ҳисобланади. Бу сайтдан фойдаланиб сиз вилоят, туман(шаҳар) ҳокимларининг, халқ депутатлари кенгашларининг қабул қилган қарорлари, фармойишлари билан танишишингиз мумкин.

e-auksion.uz

Бу сайт “Электрон онлайн-аукционларни ташкил этиш маркази” давлат унитар корхонасининг расмий веб-саҳифаси бўлиб, қуйидаги йўналишлар бўйича аукцион (танлов) савдоларини ташкил этади ва ўтказади:

– Давлат мулки объектлари, улушлари ва ижараси;

– Ижро ҳужжатлари бўйича кўчмас мулк, автотранспорт, махсус техника ва бошқа мулклар;

– Бўш ер участкаларини тадбиркорлик ва шаҳарсозлик фаолиятига бериш;

– Қишлоқ хўжалигини юритиш учун ер участкаларини бериш;

– Ер участкалари бериш ва якка тартибдаги уй-жой қуриш учун ер участкаларига мерос қилиб қолдириладиган умрбод эгалик қилиш ҳуқуқи ва бошқалар.

Аукционларда иштирок этиш учун жисмония ва юридик шахслар дастлаб, сайтдан рўйхатдан ўтишлари лозим.

Ҳуқуқшунос, Ф. Бозорқулов

• Фойдали
• қизиқарли
• веб-сайт