2025 йил 17 апрель куни Фарғона вилояти Фурқат туманида мактаб директори Гулираъно Қосимова ИИБ ходимлари томонидан ечинтирилиб, калтакланди. Бу ҳақда аёл “Кун.уз”га берган интервьюсида маълум қилган. Ушбу материал юзасидан Сенат ҳамда Фарғона вилояти ИИБ муносабат билдириб, ҳолат назоратга олинганини хабар берди. 

Манбага кўра, туман ички ишлар ва солиқ бошлиқлари ўртасидаги адоват бўлган. Солиқчидан ўч олиш пайида юрган ИИБ ходими аёл унинг уйига борган пайтдан фойдаланган. Яъни Гулираъно Қосимова эрининг операцияси учун қарз сўраб, таниши, туман солиқ инспекцияси бошлиғи олдига боради. Кейин ички ишлар ходимлари уйга бирданига бостириб киради. Солиқ бошлиғи ва мактаб директорини ечинтириб, калтаклашга тушишади. Интервьюда айтилишича, ИИБ ходимлари аёлнинг яланғоч ҳолатини телефон камерасига тасвирга олиб, ундан эркак жинсий алоқа қилишга мажбурлагани ҳақида ариза ёзиб беришни талаб қилади.

Аёл туҳматни инкор этиб, ариза ёзмайди. Кейин унга турли босимлар ўтказилади, ҳатто турмуш ўртоғига “хотинингни бошқаси билан ушлаб олдик”, деб айтишгача боришади. Манба ички ишлар раҳбари солиқ бошлиғини ишдан кетказиш мақсадида мазкур “қўлга олиш” тадбирини уюштирганини қайд этган.

Интервьюда аёл воқеа сабаб руҳий тушкунликка тушиб, ўз жонига қасд қилишга урингани, аммо омон қолиб, воқеани жамоатчиликка ошкор этганини айтган. Натижада ИИБ бошлиғи эгаллаб турган лавозимидан озод этилган. Унга нисбатан жиноят иши қўзғатилиб, тергов ҳаракатлари олиб борилган. Аммо унинг шериги ҳисобланаётган ўринбосари, аёлни таҳқирлаган тезкор ходимлар ҳали ҳам ўз лавозимларида ишлаётгани айтилмоқда. Гулираъно Қосимованинг таъкидлашича, собиқ ИИБ бошлиғи ўринбосари бўлган ишларни босди-босди қилиш учун аёлга танишлари орқали 50 минг долларгача пул таклиф қилган.

Гулираъно уни таҳқирлаб, дўппослаган, “операция”да қатнашган барча ходимларга қонун доирасида қатъий чора кўрилишини исташини билдирган. Ҳолат бўйича прокуратура томонидан тергов ҳаракатлари ўтказилиб, собиқ ИИБ бошлиғи ва масъул шахслар бўйича айблов иши мазмунан кўриш учун судга юборилган.

Олий суд матбуот хизмати собиқ Фурқат туман ИИБ бошлиғи ва унинг биринчи ўринбосарига оид жиноят иши Қува туман судида кўриб чиқилаётганини маълум қилди.

Сенат ҳолат бўйича Ички ишлар вазирлиги ҳамда бошқа ҳуқуқни муҳофаза қилиш органлар томонидан қонуний қарор қабул қилиши парламент назоратига олинганини билдирди. Шунингдек, Фарғона вилояти ИИБ ҳам юқоридаги ҳолат назоратга олинганини маълум қилди.

“Фурқат тумани ИИБ бошлиғи солиқ бошлиғига нисбатан фитна уюштиргани, бегона аёл шаънини булғагани ҳақидаги сўнгги хабар ва унда келтирилган ҳолат юзасидан прокуратура органлари томонидан жиноят иши қўзғатилиб, тергов ҳаракатлари олиб бориляпти. Бироқ юқоридаги ҳолат бўйича ҳали тергов ва суд жараёнлари якунланмасдан туриб, тўлиқ асосланмаган маълумотларни оммага тақдим этиш ортидан фуқаролар орасида шов-шув уйғонди. Шу муносабат билан фуқароларимиздан келтирилган важлар ҳали тасдиқланмасдан, суд ҳукми эълон қилинмасдан туриб, ноўрин хулоса чиқармасликни сўраймиз”, – дейилади вилоят ИИБ расмий муносабатида.

Маълум қилинишича, якуний натижа юзасидан холис муносабат билдирилади.

• Фарғона
• ИИБ
• Муносабат