Ғарб оммавий ахборот воситалари Франция ва Италия АҚШ томонидан илгари сурилган “Patriot” тизимларини Украинага етказиб бериш ғояси учун пул тўламоқчи эмаслар.

Доналд Трамп томонидан эълон қилинган режага кўра, Европа давлатлари Украина учун қуролларни сотиб олиши керак эди. Аммо бир қатор ҳукуматларга яқин манбалар Франция ва Италия ушбу ташаббусга қўшилмасликка қарор қилди деб ёзмоқда. Аввалроқ Чехия Бош вазири Пётр Фиала ҳам Чехиянинг ушбу жараёнларда қатнашмаслигини маълум қилган эди.

“Politico” нашрининг маълумотларига кўра, Франция президенти Эммануэл Макрон маҳаллий ишлаб чиқарувчилардан қурол сотиб олиб, француз мудофаа саноатини ривожлантиришни хоҳламоқда.

14 июль куни Трамп НАТО йиғилиши доирасида Европа давлатлари Америка қуролларини, биринчи навбатда “Patriot” зенит-ракета тизимларини сотиб олиб, Украинага топшириши тўғрисида эълон қилди.

Бир қатор мамлакатлар аллақачон бу таклифга қаршилигини эълон қилган бўлса-да, Германия, Дания, Швеция ва Нидерландия каби давлатлар ушбу лойиҳада иштирок этишга тайёр эканликларини билдиришган.

• Fransiya
• Италия
• Jorjo Meloni
• Макрон