Самарқанд ва Қашқадарё вилоятларида давлат ташкилотлари мансабдорлари иштирокидаги коррупция ҳолатларига чек қўйилди. Бу ҳақда Давлат хавфсизлик хизмати хабар қилди.

Маълум қилинишича, Самарқанд вилоятидаги «Ургуттумангаз» газ таъминоти бўлимининг мансабдор ходими ҳамда ушбу ташкилотнинг собиқ ходими ўзаро тил бириктириб, маҳаллий МЧЖга тегишли ишлаб чиқариш цехига янги табиий газ тақсимлаш ускунасини ўрнатиш учун лойиҳа ҳужжатларини расмийлаштириш ва техник шарт олиб бериш эвазига 2 минг АҚШ доллари талаб қилган.

Тезкор тадбир давомида улар сўралган пул маблағини олган вақтда ашёвий далиллар билан қўлга олинган.

Яна бир ҳолат Қашқадарё вилоятида қайд этилган. Кадастр агентлигининг туман бўлимларидан бири бошлиғи маҳаллий фуқарога иссиқхона қуриш учун ажратилган 50 сотих суғориладиган ер майдонини бошқа шахс номига кадастр ҳужжатларини расмийлаштириб беришни ваъда қилиб, бунинг эвазига 11,6 минг АҚШ доллари олган.

Бироқ мансабдор шахс ўз ваъдасини бажармаган. У олган маблағ ҳисобидан аввал 49,7 миллион сўмни қайтариб бераётган вақтида ноқонуний ҳаракатлари фош этилган. Терговга қадар текширув жараёнида эса қолган 89,5 миллион сўмни ҳам жабрланувчига қайтарган.

Ҳар икки ҳолат юзасидан тегишли тартибда тергов ҳаракатлари олиб борилмоқда.