Тошкент шаҳрининг Глинка кўчасида юз берган аварияга ерости газ қувуридан сизиб чиққан газ сабаб бўлгани аниқланди. Бу ҳақда Тошкент шаҳар ҳокимлиги матбуот хизмати маълум қилди.

Дастлаб “Ҳудудгаз Пойтахт” ҳодиса табиий газ тармоқлари билан боғлиқ эмаслигини билдирган эди. Бироқ кейинги текширувлар давомида диаметри 219 мм бўлган ерости газ қувурининг тахминан 375 кв см майдонидаги бир нечта жойдан газ сизиб чиқаётгани аниқланган.

Ҳокимлик маълумотига кўра, сизиб чиққан газ иссиқлик тармоғи камерасида тўпланиб, авария ҳолатини юзага келтирган.

Ҳозирда мутахассислар ҳодисанинг барча тафсилотларини ўрганмоқда. Текширув якунлангач, йўл қопламасини тиклаш ишлари давом эттирилади ва йўл транспорт ҳаракати учун очилади.

Мазкур ҳолат юзасидан жиноят иши қўзғатилган. Тергов якунларига кўра, айбдор шахсларнинг хатти-ҳаракатларига ҳуқуқий баҳо берилади.

Эслатиб ўтамиз, 3 сентябрь куни Яккасарой туманининг Глинка кўчасида йўл қопламасининг бир қисми ўпирилиб кетган, ҳодиса оқибатида бир киши жароҳатланган эди.