Ҳиндистоннинг Мадхя-Прадеш штатида Сатиш Хатик ва Сажид Муҳаммад исмли икки дўст  ижарага олинган ер участкасидан 15,34 каратли олмос топди. BBC хабарига кўра топилма шаҳар расмий олмос баҳоловчиси томонидан текширилиб, юқори сифатли қимматбаҳо тош экани тасдиқланган.

“Тошнинг тахминий бозор нархи беш–олти миллион рупий (55–66 минг доллар) атрофида бўлиб, у тез орада кимошди савдосига қўйилади”, – деди олмос баҳоловчиси Анупам Сингх.

 “Биз ер сотиб олиш, бизнесимизни кенгайтириш ёки каттароқ шаҳарга кўчиб ўтиш ҳақида ўйламаяпмиз. Ҳозирча опа-сингилларимизни турмушга беришга эътибор қаратганмиз”, – дейди икки дўст.

Маълумотларга кўра, 24 ёшли Сатиш Хатик гўшт дўконини бошқаради, 23 ёшли Сажид Муҳаммaд эса мева савдоси билан шуғулланади. Улар камбағал оилалардан бўлиб, оилаларидаги кенжа фарзандлар ҳисобланади ва болаликдан дўст.

Панна тумани аҳолиси орасида олмос излаш авлоддан-авлодга ўтиб келаётган машғулот ҳисобланади. Мадҳя-Прадеш штатида жойлашган бу ҳудуд Ҳиндистоннинг энг кам ривожланган туманларидан бири саналади. Минтақада қашшоқлик, сув танқислиги ва ишсизлик муаммолари мавжуд.

• Ҳиндистон
• топилма