Хитойнинг “Huawei” компанияси 2022 йилнинг биринчи ярмидаги соф фойдаси 52 фоизга камайганини маълум қилди. Ушбу кўрсаткичларга мураккаб иқтисодий вазият таъсир кўрсатди, бу эса ишлаб чиқарувчининг товарларига бўлган талабнинг қисқаришига олиб келди. Натижада АҚШ санкциялари остида қолган “Huawei” компаниясининг аҳволи янада оғирлашди.

Компаниянинг йиллик даромади 5,9 фоизга камайиб, 44,73 миллиард долларни ташкил этди. Энг кескин пасайиш январь-март ойларида содир бўлган.

“Қурилмалар бизнесдаги катта йўқотишларга қарамай, АКТ инфратузилмаси бизнеси барқарор ўсишда давом этмоқда”, – деди компания раҳбари Кен Ху.

Компаниянинг фойда маржаси 5 фоизга қисқарган ва соф фойда 2,24 миллиард долларни ташкил этган. 2021 йилнинг биринчи ярмида у 4,46 долларга етди.

“Huawei” компаниясининг таъкидлашича, иқтисодий қийинчиликлар, COVID-19 чекловлари ва таъминот занжири муаммолари компания смартфонлари ҳамда ноутбуклари савдосига путур етказган. Ушбу сегментдан тушган даромад чоракдан кўпроққа қисқариб, 15,02 миллиард долларни ташкил этган.

Даромадга “Huawei” компаниясининг янги технологиялар ва бизнесга киритган сармояси ҳам таъсир кўрсатди.

2019 йилда Қўшма Штатлар Хитой компаниясини қора рўйхатга киритди, бу эса “Huawei”нинг бир қатор Америка технологияларига киришини чеклади. Бу ишлаб чиқарувчининг чиплар ва бошқа компонентларни ишлаб чиқиш қобилиятига путур етказди. АҚШнинг тақиқи смартфон компанияси бизнесига салбий таъсир кўрсатди.

Қайд этилишича, “Huawei” янги бизнес йўналишларини яратишга мажбур. Шунингдек, компаниянинг 300 миллионга яқин қурилмалари учун фойдаланиладиган ўзининг “Harmony” операцион тизимини чиқарди. Ўтган ой охирида ишлаб чиқарувчи ОТнинг янги версияси – “HarmonyOS 3.0”ни тақдим этди. Тизим аввалги итерациялардан юқори унумдорлик, махфийлик ва хавфсизлик билан фарқ қилади. Унинг чиқарилиши сентябрь ойида бўлиб ўтади.

Июль ойи бошида ФҚБ “Huawei” ускуналари АҚШнинг махфий ҳарбий маълумотларини, жумладан, мамлакат ядровий арсеналига оид информацияларни тутиб олиш ва Хитойга узатишга қодирлиги ҳақида хабар берган эди. Бу хабар Хитой компаниясининг АҚШ расмийлари билан муносабатлари ёмонлашишига олиб келиши мумкин.

• АҚШ
• Huawei
• Хитой
• технология