Ўзбекистон хоккей жамоаси «Ҳумо» янги мавсумда «Pro Hokei Ligasy» чемпионатида иштирок этади. Бу ҳақида клуб расмий сайтида маълум қилинди.

Бу бўйича Ўзбекистон хоккей федерацияси келишувга эришган. Тез орада шартнома ва бошқа меъёрий ҳужжатлар имзоланади.

«Ҳумо»нинг қайтиши чемпионатимизга ижобий таъсир кўрсатади. Соғлом рақобат ҳеч кимга зарар келтирмайди. Тошкент клуби ўзининг биринчи мавсумидан сўнг ҳам «Pro Hokei Ligasy» иштирокчиси сифатида қолишни истаганди, аммо Covid чекловлари бунга халақит берди.

Умид қиламизки, энди ҳаммаси яхши бўлади ва «Ҳумо»нинг қайтиши ўзаро ривожланишга хизмат қилади. Балки бу воқеа бошқа хорижий жамоаларнинг ҳам Қозоғистон чемпионатига киришига туртки бўлар.

Қайд этиб ўтишни истардимки, «Ҳумо» август ойининг иккинчи ярмига белгиланган Қозоғистон Кубогида ҳам иштирок этишни мақсад қилган», – дейди ҚХЛ ижрочи директори Андрей Сачук.

Эслатиб ўтамиз, Тошкент жамоаси бунга қадар ҳам Қозоғистон чемпионатида иштирок этган. 2019—2020 йилги дебют мавсумида «Ҳумо-2» чемпионатда 10-ўринни эгаллаган эди.

«Ҳумо» яна ўйинга қайтди. Клуб коронавирус пандемияси сабабли содир бўлган икки йиллик танаффусдан сўнг «Pro Hokei Ligasy»да иштирокини қайта тиклайди. 

Бу янгилик Ўзбекистон ва Қозоғистон хоккей мухлисларини хурсанд қилади, деб ўйлаймиз.

Қозоғистон чемпионатида кучли ва маҳоратли жамоалар йиғилган. Умуман чемпионатнинг савияси анча юқори.

«Ҳумо»нинг турнирдаги иштироки Ўзбекистонда хоккейни янада оммалаштириш ва ривожлантиришга хизмат қилишига ишонаман», – дейди Ўзбекистон хоккей федерацияси биринчи вице-президенти Баҳодир Ғофуров.

Маълумот учун, «Ҳумо» хоккей клубига 2018 йил охирида асос солинган. Жамоа уй учрашувларини «Ҳумо Арена»да ўтказади.

• Ҳумо
• Ўзбекистон
• Хоккей